Kumpulan Rumpaka lagu Kawih sunda

Sangian/Rumpaka : Mang Koko
Laras : madenda
B A T I K

Samping Batik ngandung Wanda
Sinar na teu suda-suda
Di kampung-Kampung di kota
Nambah komara wanita
Sieup di teuteup mojang kiwari
Rincik di tilik kawanti-wanti
Lamban ngangdung pellet batik lereng bayonet
Matak bengong nu ngareret gejed milo

Robah jaman narekahan
Jadi mode, Kalakonan
Sawarna ning papakean
Tulis Batik di tumpalan
Mega mendungan batik Cirebon
Tulis nu asli motip kembangan
Setelan kabaya anu manis dangdosna
Nambah asri nu nganggona cahayaan

Batik corak nasional harga na teu pati mahal
Usahana pantrang gagal kiwari internasional
Batik nu narik buatan tasik, batik nu manis
Ngan ti ci amis batik los ngumbara
Gajleng ka amerika
Ngambah sakuliah dunia Tatalepa

Samping batik babar sawit,
Sari na moal rek leungit
Erok batik pake dangsa jorelat nambah cahaya
Keur panas poe ereng-erengan
Ngatur dangdosan keur papanasan
Rok batik sacewir, Tonggong leungeun buligir
Kapanasan rada nyengir, usum batik

Batik teu kateler-teler, kiwari jadi populer
Teu wungkul di Indonesia, tapi sakuliah dunia
Kameja koboy aya baturna
Kameja batik masieup kota
Piyama ku batik, sarung angel ku batik
Jubah jeung gardeng ku batik, Kabeh batik

Midang ginding make batik
Henteu ngan wungkul ti tasik
Tapi meni unggal kota
Pakean sagala bangsa
Sagala batik ceuyah di kota
Sumanget batik di mana-mana
Kimono kubatik mode show tina batik
Kulit sapatu ku batik
Kabeh batik

Sangian : H. Koko Koswara
Rumpaka : Nano S
Laras : Madenda

H I R U P

Geus di tebarkeun mustika hirup ti wiwit lahir
Geus di kocorkeun bayuning tresna, geusan panyaeur
Mangka jadi kuat ati, mangka tuwuh juuh asih
Eehh naratas jalan, neretes gawe muni keeling

Samakta bral miang tandang, sing ajeg ngabela tangtung
Prak gawe bakti, rumaksa ka lemah cai
Getih jeung kesang sing nyangsang dina puseuring kahayang
Nikmat jeung senang sing nyerep, lain ngan ukur keur urang

Golak hirup miwanda lautan ombak
Ngayun tincak ngagoda urang tumamprak
Teu kudu ring-rang kapan tamaha urang balayar

Sanghareupan binarung ati nu sabar
Nyengcelak munara cahya, Nu jirim na alam batin
Hirup, di anjeuna hirup ka anjeuna madep Gusti
Nyanggakeun raga jeung nyawa,
Kuring teu ngaboga-boga

Sangian : H. Koko Koswara
Rumpaka : H. Koko Koswara
Laras : Madenda
DUH INDUNG

Duh indung, ngaraksa ngajaring
anak najan rungsing matak pusing
heunteu weleh deudeuh, mikanyaah asih
di momong jeung di titimang

Duh indung ngaping ngadama-dama
Anak nga mumule buah hate
Ngajung- jung tur ngugung-ngugung
Anak di jieun puputon

Duh indung, duh indung timang titi
Ngamongmong anak
Duh indung, Aduh indung
Teu kendat ngadu du’a

Sangian : H. Koko Koswara
Rumpaka : Dedi Widiyagiri
Laras : Pelog

SARIANG LAYUNG

Sariak layung di gunung
Hiber pasini patepung lawung
Teuteup jauh ngawang-wang nu di pigandrung
Duh…ngawang wang nu di pigandrung

Haredong meuhpeuy harideung
Jalan satapak rarambu leuweung
Kumalangkang renghapna nu di pitineung
Duh…renghapna nu di pi tineung

Surya surup layung hibar
Katanjakan sawangan di umbar
Geus ngolebat ieung, samar, samar
Hariring asihna katineung ngalalar

Angin tiis ti mumunggang
Kaitipan harewos kamelang
Tawis deudeuh ieung nu mamaranti
Sungkeman kaheman
Saranggeuy malati

Sangian : H. Koko Koswara
Rumpaka : Dedi Widiyagiri
Laras : Pelog
TINA JANDELA

Tina jandela urang silih kiceupan
Lemu paneuteup, deudeuh jeung geugeut teup eunteup
Taya nu nyora simpe henteu nyarita
Ngukir ciptaan tresna jeung asih marengan

Lir nu keur ngimpi, Lir nu keur ngimpi,
Gambar lamunan naon geuning nu teu katepi
Lir nu di sirep, Lir nu di sirep,
Geter katineung deudeuh geuning reup…rerep

Tina jandela urang silih gupayan
Imut kareueut raga katresnan pa deukeut
Langit keur lenglang, jauh tina kamelang
Urang jadikeun galuh pasini lawungkeun

Sangian : H. Koko Koswara
Rumpaka: Winarya, art Laras : Madenda

HAREUPEUN KACA

Hareupeun kaca ngajanteng salila-lila
Ruman alum gurat duka atra narembongan
Hareupeun Kaca sagala nu karandapan
Lalakon katukang-tukang nungtut dararatang

Reueuk rumeuk dina eunteung
Semu keueung semu nineung
Jiwa awaking nyarita
Jiga nu nganaha-naha

Duh ieung geuning, jiga nu nganaha-naha
Bejakeun deudeuh bejakeun
Rumasa geus katalimbang

Hareupeun kaca sagala nu karandapan
Lalakon ka tukang-tukang
Nungtut dararatang